Blog Matthew (OLD)

我的投資態度有改變 朋友都留意到
呢一兩個月 我主力短線

這種心態上的改變是有原因
從我覺得自己有小小資本開始(唔好以為好多)
我就想過搞生意 我研究過不同方案
而最重要o既係 評估過自己適唔適合做生意
詳細我唔講喇 諗完一輪 我決定唔做
呢一個係深思熟慮的結果
除非有一日我遇到一位可以相信
條件又合適的伙伴 可惜還未遇到

自從我決定不搞生意的一刻
我要找尋另外一種收入來源
現在去炒細股、做投機係為o左賺多少少錢
我的策略不是要放棄長線投資
而係我覺得現在股市已經買唔到價錢合適的股票
如果我堅持要做長線投資
我現在會選擇乜都唔做 離開市場
(當然我手上仍有些股票是死渣不放)

在不同的環境 就要做不同的部署
做短線就要做好風險管理 做止蝕
"不問蠃，先問輸"
入場先要問自己你可以輸幾多

見我賺錢的時候 你留意唔到我背後花過的 effort
睇書、睇報紙、睇雜誌、睇 Forum、讀財報、聽電台、掃 Google
我會做筆記 掌握每個股評人的風格
選出邊 D 股可以考慮 再諗可以買邊隻 幾時買 買幾多
再度我的入市計劃係點 目標幾多 止蝕幾多 值博幾多

不記得這些工作佔我幾多時間
因為我一做就投入去做 算係興趣之一
你可以話我咁忙為乜 個市癲都唔需要有理智
但係我想作每次買賣都要有個基礎
我要我做每一次買賣都要有進步
唔單止係為呢一刻去賺錢
我仲想提高以後自己的能力

加上我這個人天生就係資訊狂
對任何事物好奇 我都會花時間去睇去讀
甘於寂寞 孤僻 敢於轉呔認衰 這些都是我的缺點
但偏偏在股海裡面卻反而對我有好處

見識過牛市三期的瘋狂 瘋狂時我要進取一點
未來我要經歷的還多 熊市來臨時我會點？
假若心裡面能夠建立一套原則
相信多少風浪來臨都不致於失去方向