聽到有人叫呢齣戲做《日本沉悶》，又真係幾貼切。其實我覺得災難片真係好好拍，只有要本去拍，都一定係穩賺o既。首先，講下我認為災難片o既要素：
- 真實感（或者投入感）
- 感人程度
- 故事條橋（較次要）
戲裡面的情好淡…或者係導演刻意舖排一段比較內歛的感情線。就係因為咁，感動唔到我，我都唔明白主角間的愛有幾深，我只知道男女主角每次見面都係一場很悶的文戲。當災難來臨的時候，正是襯托一段可歌可泣愛情的絕佳背景，催淚的功夫都係韓劇的導演比較到家。除了愛情，親情、友情也很淡…
災難片不太需要故事，只要拍得夠真、夠感人，小小的犯駁和瑕疵都是可以接受。但係《日》以上兩點都無，犯駁和瑕疵自然不能接受。男主角身處陸沉中的日本，仍然可以周圍“雲遊＂，確實利害；配角“結城＂有妻有兒竟然不顧，留底說要為兒子保護家鄉？這算是個什麼的爸爸？不合常理地自私；代理首相離開本土，評估災情是合情合理，我不覺得他有什麼問題；博士提出的解決方法…成效成疑，我覺得有可能引發另外一場更大的災難囉。全日本得兩隻深海潛艇、兩個合格駕駛員，咁其他國家都有呱？就算無，放炸彈的時候可唔可以安裝埋個搖控引爆器？唔洗再派人落去咁危險。算你係 Work 喇，咁爆法，起碼都有幾場海兆呱？周圍的船艦竟然絲毫無損。
總括而言，整齣戲只在太保守，太表面化，太穩陣。一切劇情都在預期之內，睇落去全無神采…可幸的是，沒有例排出現在荷里活電影裡的做愛場面，實在難得。
今晚是《神鵰》的大結局，最後一節楊過表演了“神鵰無雙＂，誇就誇o的，但係好睇就得啦。總括今個星期的《神鵰》共 7 個小時的劇情，可謂絕無冷場！只可以用一個字來形容—“精彩＂！
尋晚睇o左，《禍水》的導演和編劇就是大名鼎鼎的 M. Night Shyamalan。
點解佢咁出名？因為佢就係當年《鬼眼》的導演和編劇，之後作品有《不死劫》、《驚兆》、《森魔》…全部都是以“扭橋＂作為賣點，觀眾入場就係想睇下佢條橋點樣“扭＂法…
其實從《鬼眼》之後，導演的表現就不斷跌 Watt，一齣比一齣唔好睇，今次《禍水》直情插水，故事條橋佢話點就點，全無邏輯可言，拍得又唔係話好有劇力，又唔緊張…那個所謂的“東方傳說＂，我唔知佢個東方指邊度，裡面所提到的 Healer、Protector、Interpreter 好似全部都係西方的奇幻傳說概念，我玩 Online Game 就聽唔少。那兩個“東方人＂，都唔知佢講咩話，唔係普通話、唔係韓文、唔係日文…其實戲裡面無壞人，只係有個人比較自大，同埋講錯o左少少o野o都，咁就無啦啦死o左，仲係好無辜個隻。
“扭橋＂唔該扭得靚o的，不斷自圓其說，咁「你講曬啦！」。個戲名更加係“唔啦更＂，《紅顏禍水》仲好o的，因為起碼有三個字貼題，不過《禍水》個名似鬼片，可以引多o的觀眾。導演憑佢個名，整呢個超低成本製作，絕對可以賺一筆，但唔好諗住想未來再賺多次喇。
- 邊個咁大仇要咁做？
- 邊個夠膽咁做？
- 邊個夠膽係眾目睽睽之下咁做？
- 邊個會由此得益？
- 邊個唔係香港人？
- 何俊仁和目擊者的“證供＂都表o左態：我地淆底。
邊個有咁大勢力？
大家都知道係邊個，但吹佢唔賬，唉！
報紙、雜誌、電台都對呢次事件多過全方位的評論，所以我再講o的乜野大多數都係重覆觀點。從個人黎講，我都係一個曾經好八掛的人，都經常買《便利》之類的八卦雜誌。但從某一刻開始（大約兩、三年前）我就覺得唔應該買落去。
曾經在中環區工作過一段很短的時間，每天都看到很多白領，個個身穿行政服裝相當醒目，個個都係知識份子，一個字—型！但當睇到有人手上拎住本《便利》，我就即時對這個人的印象大打節扣：我會懷疑他個腦係諗緊乜野？他的道德水平係點？他的人格會如何呢？簡單咁講，我會覺得呢個人：唔掂！
「成日鬧，又要睇」，香港人表面的道德水平很高，但心裡面的道德水平就好低；八卦雜誌做得越黎越過份，常常測試我地o既道德底線，一方面壓底“心裡面的道德＂，另一方面社會輿論又會拉高我地o既“表面道德＂，最後個個人都成為偽君子。“唔掂＂的觀念令我去重新審視自己的行為，當買呢o的雜誌時我會覺得尷尬、羞恥。
其實呢個 Post 我想講咩呢？
《便利》咁做落去只係做衰自己個名，我只係個普通香港人，我都會覺得唔想買落去，其他香港人都會漸漸醒覺（我知今期好銷得）。
PS: 我對買《便利》的朋友們絕無任何偏見，以上觀點並不適用於我的朋友身上 :P
最近公司一口氣請了三位新同事，兩位是屬於我的 Team，一位是屬於另外一 Team，他們都是 Fresh Grad。我負責 Training 不是第一次，今次 Train 他們的責任落在我身上，但與過往不同的：如何安排、講解、Schedule 都是我一手包辦。自問我不是一個好的 Trainer，因為一直以來我都覺得自己做 Briefing、Presentation、Training 的時候都有點緊張，說話的速度有時變得很快。同時間我要處理日常的工作，所以 Training 安排得也不是最好。可幸的是各個新同事都是很醒目，態度很好，不會讓人操心，對我 Training 時的不足都很寬容。
我的 Team 已經增至 6 人（包括 Leader），已經不是個細 Team 了。我只感覺到未來將有更多重大的 Project 降臨，人多好辦事？還是人多手腳亂？不確定因素實在太多，我已經不能獨善其身。
近日最愛聽古巨基的《愛得太遲》，因為好聽…
歌詞對於我來講很到肉，有一晚我無意中聽到這首歌，突然間心裡面有一股感動，我的雙眼，突然有一點濕…近半年的時間裡，我將金錢這樣東西看得很緊，一方面我要計劃我的前途，另一方面我認識到投資的方法，我希望盡可能將我的能力發揮…我每天放工，就躲在房裡面，除了吃飯，我就在房裡面看書、上網讀新聞、Check News Feeds、聽著每天的財經時事節目、看科技雜誌…直到睡覺。
有一晚食完飯，我看到新一輯的 The Apprentice，媽媽一向是廳裡面電視的話事人，我問媽媽看一陣好不好？如果是以前，她一定會反對，但想不到她竟說：我平時都睇夠喇，你咁少出黎睇電視，你鍾意睇邊個台就睇邊個啦…
有一日，我正在讀《美元的墜落》，見差不多時候就想出去游水，之後家姐打電話來提起，我竟然忘記了當天是媽媽的舊曆生日…
原來我近呢半年，已經未曾幫過媽媽抹地…轉眼看出廳，是媽媽抹地的身影…
爸爸的近況是怎樣呢？好像已經很久很久沒有聯絡，我每次想給他一點錢，但他都沒有收，有一日他更存了一筆錢落我戶口，我還說相約食飯，但到現在沒有下聞…
家姐的女兒，我叫他做"妹妹"，我常說我很愛她，但其實我又做過什麼？上一次的生日，我又忘了，我沒有買什麼禮物給她，是媽媽幫我約食飯興祝的…
回憶起的實在太多…
多少抱憾 多少過路人 太懂估計 卻不懂愛錫自身
人人在發奮 想起他朝都興奮
但今晚未過 你要過也很吸引
縱不信運 你不過是人 理想很遠 愛於咫尺卻在等
來日別操心 趁你有能力開心
世界有太多東西發生 不要等到天上俯瞰
行書店係我o既嗜好，因為我都幾鍾意睇書。無睇開投資書之前，我都幾鍾意睇少說和歷史類o既書，睇得多自然能夠睇得快。但係當近排睇得多分析性的投資書， 就發現自己就算真係睇得好快都無用，因為唔似小說或者歷史書咁容易吸收，睇完就等於無睇過，完全唔掂。行尚書房見到一本大陸書《六色螢光筆學習法》，覺得 好似對我的“閱讀理解＂有 D 幫助，就花了 25 蚊買黎睇下。
本書內容重點係：教你點樣讀經歷，教你點樣用 6 種螢光筆去間重點，一隻色代表一類重點。你間重點的同時，你會不知不學將文章的內容分析和分類，達到深刻理解的目的。而當你翻看第二次的時候，因為重點已經分類清楚，自然能夠快速溫習。以下係各種顏色所代表的重點：
- 定義 - 粉紅色
- 假設 - 藍色
- 分析 - 黃色
- 結論 - 橘紅色
- 優勢 - 綠色
- 缺憾、問題點 - 紫色
睇 完之後，我當然第一時間去試下啦，不過係書店我並搵唔到一套 6 色的螢光筆，而且散買都幾貴o下，唯有將價就貨，買了一套 Pilot 的 5 色 Spotliter 2 試下，Total $38 。由於我得 5 色的關係，而且我買的螢光筆顏色都唔同，又鑑於我讀o既唔係經濟書，作者的定義我覺得唔係咁o岩我用，於是就係分類方面改少少，並重新將顏色定義。
- 重點、概念、總結 - 橙色
- 分析、假設 - 黃色
- 事實、例子、經歷、敘事 - 藍色
- 建議、做法、好處 - 綠色
- 失敗例子、壞榜樣、警戒 、Warning、疑問、壞處 - 粉紅色
其實點定義好睇個人需要，個個人都未必要一樣。自從用過呢種方法讀書之後，係明顯睇書睇慢o左好多，但就會 Keep 住你個腦去諗o野，由一個被動閱讀的情況轉變成主動閱讀，容易入腦，可以一試呀。
本來呢篇文係尋日 Post o既，但係之後我要傾電話，於是"Save as Draft"先，點知今日睇返，篇文已經消失o左，又要再打過。我本來想講o既係，尋日我放了中海油（883），死好命地放完就跌。但係建行（939）同埋宏利（945）就真係要放埋係床下底，浮下沉下，有位人兄同我講，買得呢o的股票就唔好望佢會大上，係睇長線o既，呢o的都可以係一句好好聽o既安慰說話o黎o既，但另一邊，望住一隻我當初想買又唔夠錢買o既港機（44）一飛沖天，你話我眼唔眼紅？換馬嗎？點換？隻隻靚o野都咁貴。有人叫我去買大陸房地產，但明知個宏調無效，大陸會唔會再黎調多一次？買o左到時就大鑊。有人叫我買大陸汽車股，話大陸需求好勁，好有前景，但市場好係咪就代表佢地好？林森池講過什麼叫經濟專利，好似那些汽車股都係嘛嘛地。呢個時候，最好靜靜地睇書，乜都唔好理住，保持耐性。
今晚和同事一同看了《死！忘，不記！》，對於我這種看過漫畫的人，實在覺得好悶呀。其實罪不在電影，它是拍得好的，忠於原著又能夠將漫畫的神髓濃縮。怪只怪太過忠於原著，無甚驚喜（我是不是太挑剔呢？改又唔鍾意，唔改又無驚喜），兩個多小時的片長，打了數個呵欠。
記得有位同事為這齣電影特登走去看漫畫做足準備，真是為他難過，下場可能和我一樣。
從尋日開始，我就不停流鼻水，分析原因，是不是因為訓覺凍襯？我覺得遠因係：已經有兩個星期無做過運動喇…於是今日決定去游水（今天我放大假），好舒服，游完水再行下書店。原來蔡子強的《新君王論》已經出到第四本，而且仲係第二版添！我幾時錯過o左o架？呢個系列我不嬲都儲開，於是毫不猶豫拎o左一本，再買埋方卓如的《國金外望》，$100 有找。今晚打算重溫返《加勒比海．盜》的第一集，因為尋日睇完第二集。第二集，睇o既時候我講左好多句（心入面〉：咁都得呀？正所謂講古唔好駁古，但都唔係咁離舖呀嘛，個鬼船長o既鎖匙咁容易比你偷到、又咁容易走到、走到又咁好彩唔死得，好多場都好無聊，無啦啦打打打，個海咁大，又會咁橋撞到o既？！就算咁好彩都算喇，可唔可以比返上一集o既心思我呢？坐過山車o既劇情，都唔容許你個腦諗咁多，塞飽你就完場。
超強颱風桑美登陸浙江, 快崩潰的男記者 + 女記者現場報導
大陸的電視劇、遊戲節目質素越來越高，估唔到而家新聞都咁激…我諗：洗唔洗咁呀？
繼“中央台世界黃健翔事件＂、又有“湖南衛視超女走光事件＂，加埋“呢件颱風新聞記者事件＂，件件出乎意料，Gimmick 十足娛樂性豐富 ，香港o既電視，仲有乜o野好睇呀？
《星空舞狀元》係星空衛視星期五晚上播放o既“真人 Show 比賽＂，幾個月前我偶然係星期六睇到重溫，而家佢已經成為我每個星期必睇o既節目。
制作單位走遍中國各大城市，舉行初賽、複賽、決賽，最終目的係挑選一位他們所謂的“星空舞狀元＂。初期的節目內容係相當搞笑，有o的類似我地香港o既“殘酷一叮＂，因為在初賽階段，參賽者的質素都很參差，部份更只是想博上鏡，除跳舞之外仲做埋各樣才藝表演，志在比星探或者電視台發挖。到中後期，呢班投機份子已經 Foul 曬，餘下來的參賽者都係有一定實力。而係呢個階段，節目開始變得專業和感性，好似《生還者》咁著重各位參賽者的心路歷程，這個節目和其他“真人 Show＂不同之處是在於它的真實性和人情味，透過訪問，我了解到佢地都係排除萬難才達到這一步。
參賽者專業的態度和投入感係最吸引我o既地方，自問對舞蹈係門外漢，但睇他們從排練到比賽，完全唔會覺得悶，而且仲好好睇，我諗係受到佢地o既熱誠所感染吧！對比起 《America Next Top Model》 裡面o既些參賽者，對時裝界唔熟悉，對時裝也唔熟悉，假熱誠、假投入、假理想，《星空舞狀元》實在好睇太多喇。
《ANTM》觀眾最想睇參賽者點樣出醜法，《星空舞狀元》觀眾最想睇參賽者點出色法。
我有 NDS 和 PSP ，所以間中都會留意一下 Forum 或者 Newsgroup o既二手遊戲區有乜o野 Game 好買。好多時當有一隻 Game 好 Hit，一出就會好多人買，但過一兩個月之後就有好多人放，之前o既《新孖寶兄弟》、《孖寶賽車》都係咁，多人放自然就跌價跌得多。
如 果我好想買一隻二手 Game，但覺得太貴喇，於是我就會係 Newsgroup 或者 Forum 出一 D 賣呢隻 Game o既 Post，價錢盡量 Set 低（但要合理），萬一有人向我買的時候，我就話已經賣出o左，自己製造成交，重複透過這種手段去拉低隻 Game 的平均二手價，等到價錢適合又有真正的賣家出現，我就可以買平 Game 嚕…
剛剛做過幾次買賣都有少少賺，我話值得買，我有我的道理，但事實係咪因為我o既道理令佢升呢？真係天知，因為睇報紙又有另外幾百個理由話佢升。人好多時都將功勞歸於自己，覺得自已永遠都係最清醒個個，我暫時沒有這種心態，但也要阻止這種心態萌芽。
結論係…呢 D o野真係撞手神，好過買六合彩咁話！當投資變質成為賭博，基督徒係時候收手喇。
@Toward Financial Independence 提到，到底如何達致財務上的自由呢？首先要界定何謂財富：
用一條非常簡單的公式：
收入 - 生活開支 = 財富
財富就是這麼簡單，我地每個月淨返落黎o既錢就係我地o既財富。而最簡單累積財富的做法是：
降低自己的生活水準，洗少 D 錢。
咁到底點樣先至做到財務上的自由呢？財務上的自由可以定義為：
萬一我失去了現有的工作，我其他的收入都足以支付我的生活開支。
所以要做到財務上的自由，我地就唔可以只係顧住現有的工作，我地要開拓更多的收入來源。開拓更多的收入來源我知道唔係咁簡單，更加係唔可以強求，@At the Very Least 提到我地可以從興趣方面著手，外國有很多成功的例子係有個人在某一方面有興趣，他開設一個專門的網站作交流，慢慢吸引人流，從網站廣告得到了收入。另一種 開拓收入來源係：投資，投資可以係股票、外匯、基金等等，但投資的第一步就係要儲有足夠的資本，所以更加要減底生活開支，降低自己的生活水準。至於其他方 法，大家就要動動腦筋。
其實這些概念，一本好出名o既書：《富爸爸，窮爸爸》就已經好早提過，我升上大專的第一年就已經買o左黎睇，但係 抱住人睇我又睇的心態，完全無融會貫通，睇完就算，我相信好多人都同我一樣。不過《富爸爸，窮爸爸》的主旨係鼓勵人創業，但我相信這個方法不是人人適合， 起碼我就係一個唔適合做老闆o既人。
從今日開始，洗少 D 錢，降低自己生活水準，咁就有多 D 錢，生活上找尋機會去開拓更多的收入來源。就算你做不到財務上的自由，起碼當你沒有錢的時候，因為生活水準都降低o左，生活也不致於太難過。
參考：《富爸爸，窮爸爸》，Get Rich Slowly，An Entirely Other Day
吾土吾情﹕國際炒家中計 (2005-10-18)
8月24日，周一股市重開，政府總結過去五個交易日經驗，不容國際炒家有喘息機會，重槌出擊期指，買8月沽9月，迫炒家平8月倉。同時聘富林明及金英這兩家經紀行加入御用經紀行列，聯同原先政府聘用的經紀行一齊入市，狂掃藍籌及二線股，恒指升逾三百點，接近七千九水位，市場估計，是日政府動用60億至80億元。
8月25日，政府在股市及期市敲響勝鼓後，匯市亦發動攻勢，突然抽高隔夜拆息至15厘，把國際炒家殺個措手不及，令其回補港元成本大增，更推高期指接近八千水位，令8、9月份期指差距拉闊，增加轉倉成本，迫其平倉離場。
同時，由於上幾日政府大力托高豐等大藍籌，予國際炒家一個超買假象，誘其中計拋空八百多萬股豐後，立刻強制執行T+2，在豐此大藍籌市面貨源短缺，無從借貨的情況下，國際炒家只好在市場高價補倉，再一次損手爛腳。
8月26日，外圍市況欠佳，期指中段波動較大達三百點，恒指則跌55點，大市進入暴風雨前夕的平靜。
8月27日，期指結算前夕，政府入市，雷霆萬鈞，狂掃33隻恒指成分股，國際炒家負隅頑抗追沽，市內此起彼落，狂吸狠沽，全日成交高達230億元，8、 9月份期指差距亦拉闊逾三百點。是日，索羅斯旗下量子基金總經理在新加坡接受傳媒訪問時，公開承認該基金入市港股及期指。
8月28日，期指結算日，政府不容功敗垂成，國際炒家見勢不妙，但求全身而退，開市便狂沽豐及香港電訊，但政府嚴陣以待，見貨接貨，上午成交達460 億元。午後，炒家孤注一擲，繼續狂沽，政府手瓜硬，恒指企穩七千八巋然不動，以7829點收市，全日成交高達790億元，8、9月份期指差距擴大差幅達 643點。
這一仗不浴血的香港保衛戰，如果特區政府輸了，慘過「三年零八個月」的淪陷日子。今特區政府大獲全勝，港人無不額手稱慶。尤為可喜的是，政府在這一役中購入的港股，到了1999年6月21日結算，多賺936億元。
韋基舜
--
此文章並非本人作品，因為覺得甚有價值，特此剪存。
原文來源：成報 www.singpao.com
版權特有人如認為本 Blog 的轉載行為不恰當，本人會盡快將內容刪除。
吾土吾情﹕交鋒十天，波譎雲詭 (2005-10-17)
特區政府動用千億儲備，與國際炒家鏖戰十日，從8月14日至8日28日，交鋒十天，波譎雲詭。
8月14日，星期五，戰幔開啟，財政司司長曾蔭權公開表示金融管理局動用外匯基金，入市干預股市及期貨市場，痛擊國際炒家離場。首次交鋒，市場估計金融管理局只動用40億元，而選擇這天入市，顯然是經過深思熟慮，因為接下來的15日及16日為周末周日休市，而17日雖是周一，卻是公眾假期（香港重光紀念日），炒家縱然反擊，也須在三日後，周二（8月18日）開市才行。
8月18日，美股雖告回穩，但外圍市況未明，政府買盤未有積極入市，只重點接貨及吸納電訊股，俾令恒指企穩七千二水平。國際炒家經上周五打擊後，亦把數千張8月期指淡倉合約轉入9月，以圖後計。
8月19日，政府趁外圍利好消息，掃高大市，並向託管股票銀行及中央結算公司施壓，嚴格執行T+2制度，截斷國際炒家借貨來源及拖延時間補貨，但仍有超過一萬張8月份期指轉9月份。所謂T+2是交易後兩天便要交收，曾有經紀行提出把T+2改為T+4，把交收時間多延長兩天，但被證監及聯交所及中央結算公司否決。
8月20日，在日圓回升利好因素下，政府於早市買盤掃高兩百點，午後稍為縮盤立見有英美背景基金狂沽期指及推低大藍籌，政府有見於此再入市，是日恒指升逾百點。
8月21日，政府從14日入市至此，恒指已升逾千點，這天為周五尾市，加上俄羅斯經濟情況惡化，政府按兵不動，國際炒家有機可乘，質低恒指兩百多點，收市前幾分鐘更出現火爆鏡頭。事後有在場經紀說，是當時期交所內有八名高大健碩外資經紀圍成一圈，不斷叫低價位，企圖叫至極低價時才由自己人承接。當時有些代表政府的經紀，欲加入接貨，卻被這八名大漢阻攔，令是日期指大幅下跌。
韋基舜
--
此文章並非本人作品，因為覺得甚有價值，特此剪存。
原文來源：成報 www.singpao.com
版權特有人如認為本 Blog 的轉載行為不恰當，本人會盡快將內容刪除。
吾土吾情﹕國際炒家狙擊香江 (2005-10-15)
歲月如梭，這專欄行文逾兩載，講的多是幾十年前香港舊事，對於近年發生的事，趁著仍未忘記，記敘下來，祈與讀者一齊溫故知新。
「九七」回歸之初，香港社會經濟曾遭受嚴重衝擊，衝擊來自東南亞爆發經濟危機。
一直以來，國際金融市場大鱷（炒家）已經監察著東南亞一些社會經濟基礎脆弱、國庫儲備不多、社會環境不安的國家，伺機狙擊該國匯率及股市。
1997年7月2日，泰國中央銀行突然宣布放棄實行了13年的固定匯率制度，改用浮動匯率制度。早已虎視眈眈的國際炒家立刻狂拋泰銖，令泰銖在當天已狂跌20%。在泰銖匯率大跌牽連下，菲律賓、印尼、馬來西亞及緬甸等國的貨幣亦接踵大跌。與此同時，國際炒家並向上述設有股市的國家，狙擊其股市，遂令本是「一紙值千金」的股票變成一文不值的「牆紙」。一股金融風暴形成，肆虐東南亞地區。
國際炒家心存大慾，並不滿只攻陷菲、馬、緬及印尼。經過一番部署，於8月開始作試探式狙擊南韓、台灣及香港三地的匯率及股市。8月中旬，開始有所行動， 8月19日，港股恒指跌了619點，萬五點告急，但當時仍有買家入市，吸納有實力銀行、地產股，跌勢稍斂。國際炒家未因稍獲甜頭便收手，反之變本加厲，加狂拋空港股，8月28日，恒指跌650點，跌幅達4.23%，連同當晚的倫敦港股參考指數共跌了接近千二點，恒指萬五點失守，為1987年股災以來第五大跌幅。
同日，覆巢之下，東南亞股市，無一幸免，其中韓國跌1.8%﹔台灣跌幅達2.2%﹔印尼跌4.5%﹔馬來西亞跌4.2%﹔泰國跌2.3%﹔新加坡跌3.62%，而跌得最慘的是菲律賓，證交所30種指數跌212點，跌幅達9.3%。
韋基舜
--
此文章並非本人作品，因為覺得甚有價值，特此剪存。
原文來源：成報 www.singpao.com
版權特有人如認為本 Blog 的轉載行為不恰當，本人會盡快將內容刪除。