Blog Matthew (OLD)

在大陸的日子
請了五天的大假上大陸，目的是和媽媽家姐一起吃喝玩樂，見見親戚朋友，relax 一下吧！但好多時都事與願違，話說準備花半日時間幫媽媽做的賣樓手續，搞搞下就花了幾天…周圍走，去了不同的大陸機關辦手續，由朝搞到晚，真係煩死人，效率又低…而今次更令我親身體驗到建行（939）的服務質素，返到黎香港我真係好想沽o左佢。對假期沒有什麼不滿，就當幫媽媽做事也是我的責任，而大家相處的時間裡都有開心的時刻，而且食o野好平又好味，大魚大肉也不會肉赤，吃飽飽的、傾傾計過一個晚上，我很享受。

返回香港的日子
在大陸我可說是與世隔絕，沒有電視、沒有上網…返到屋企第一件事就係打開電視睇新聞，我發覺 NOW 財經台真係好好睇，唔好講股票分析得準唔準喇，有幾個節目我覺得內容充實：《大鳴大放》、《市場放大鏡》、《環球金融快線》等等…其實其他節目也很好，不過我不記得它們的名稱。無辦法，平時我很少看電視、也沒有電視的控制權，只有在假期兼獨居的環境下才能夠一窺 NOW 財經台，坐係度我就睇o左成日…

不過我發現有一個問題，如果整個交易日都睇住財經台，你會同個市跟到好貼，就好似你個人行 緊一個 Shopping Mall 或者超級市場咁，周圍不斷有 Sales 同你介紹邊隻產品好，邊隻產品唔好，行得多自然會心郁郁，唔多唔少都會忍唔住買o野，有o的可能真係好o既產品，有o的係次貨都未定，隨時賴o野…

財政赤字
大約一年前，我開始每月為自己做一張 Balance Sheet，記錄住我的收入和洗費，咁樣會比較有系統咁計劃我的儲蓄、投資、消費等等。一直我都做到收支平衡，但係近呢三個月都錄得財政赤子，財政赤字來自多項的非經常性花費，包括幾件電器、返大陸的洗費、圖書、遊戲、食飯等等…除了自己缺乏紀律之外，我發現信用卡係其中一個罪魁禍首，信用卡真的能夠減少自己消費時的考慮和壓力，以前我唔會覺得係咁，但自從使用信用卡成為一種生活習慣之後才慢慢發覺。我認識一位女性朋友並不擁有信用卡，我開頭覺得好奇怪，沒有信用卡我會覺得很不便，但原來減少這一種方便，你每次消費都會更加諗過度過，未嘗不是一個好習慣。當然，女性有一個先天的優勢，就是平常的娛樂消遣，可以交給男朋友來支付，男朋友沒有信用卡就不行喇…

星期日好節目
見今日比較得閒，屋企又好似好大塵，所以進行一個大清潔，先吸塵，後拖地…搞搞下個人真係超熱，出曬汗，於是打大赤肋繼續做…見把風扇大塵，拆o左佢，再清潔…周圍都執o左o的垃圾出黎…做完曬之後，好支力，但周圍乾淨又整齊，幾滿足，住都舒服o的。情況就同 Programming 差唔多，Refactor 完之後我都會有咁o既感覺，不過屋企係會比阿媽睇到，會有人讚下，但寫 Program，老細就唔多理會喇…